Tartuusalik

Qallunaatut atia: Almindelig månerude
Latiinerisut atia: Botrychium lunaria
Tuluttut atia: Common Moonwort
Gruppi: Uiffaat
Naasoqatai: Naasut inerittussaasivillit
Ordeni: Pulateriaarsuup oqaasakkui
Ilaqutai: Pulateriaarsuup oqaasai

Tartuusalik naasarpoq sivinganerni, sisuani, qerrulinni, sivinganerni panertuni seernartumillu issulimmi.

Kanaartaa, pilutai kingunissaalu
Naasuuvoq kanaartangasoq ataasiinnarmik nunamit nuisasumik pilutalik. Pilutaa naatsoq sippaasaqanngitsoq sungaartoq qorsorpaluttoq. Pilutaa kinguaassiorsinnaanngitsoq tartungasunik 4-7-nik sippalik, takisuumik kanaartalik eqimattaararpassuarnik angisuunik issukullannik kingunissaqarfilik.
Tartuusalik kingunissisarpoq naasut inerittussaasivillit allat assigalugit inerittussaasivimmi.

Uiffak killavaartoq

Qallunaatut atia: Krumfinnet skjoldbregne
Latiinerisut atia: Polystichum lonchitis
Tuluttut atia: Holly-fern
Gruppi: Uiffaat
Naasoqatai: Naasut inerittussaasivillit
Ordeni: Uiffaat orangeanik inerittussallit
Ilaqutai: Siaangasunik pilutallit

Uiffak killavaartoq naasarpoq issumi sisusartumi isugutasumi inuussutissaqarluartumi, paarnaqutaannalinni naggorissuni, qaarsut quppaanni, sisuani akuttusuunillu orpigalinni.

Pilutai kanaartaalu
Pilutai amitsukujuut, naatsunik kanaartallit sippaasallit, manngumikkut qummut sammisunik kapuutaasallit. Kanaartaa tattaasalik kajortoq qaamasoq qitermigut quassugaasalik. Pilutaasa qaavi qillertut, atai tattaasallit meqqullit. Pilutaasa sinneri aamma tunuleriit marlunnik angisuunik kingunissaqarfeqarput ataatungimikkut saagoqarlutik. Kingunissisarpoq inerittussaasivimmi. Pilutai iloqqasuupput.

Uiffak nissalik

Qallunaatut atia: Almindelig frynsebregne
Latiinerisut atia: Woodsia ilvensis
Tuluttut atia: Rusty Woodsia
Gruppi: Uiffaat
Naasoqatai: Naasut inerittussaasivillit
Ordeni: Uiffaat orangeanik inerittussallit
Ilaqutai: Siaangasunik pilutallit

Uiffak nissalik naasarpoq paarnaqutaannalinni qaarsullu quppaanni panertuni.

Pilutai kanaartaalu
Pilutai takisuut manningasut amitsukujuulluunniit sippallit. Kanaartaa pilutaasalu atai tattaqarput meqqoqarlutik. Pilutai qorsuit qasertut, kanaartaa aappaluttoq kajuartoq.

Inerittussai
Pilutami ataasigut inerittussaasiveerarpassuaqarpoq ujalussiaasanik saagulinnik. Kingunissisarpoq inerittussaasivimmi.

Uiffak qunnerarmiu

Qallunaatut atia: Skør bægerbregne
Latiinerisut atia: Cystopteris fragilis
Tuluttut atia: Fragile Fern
Gruppi: Uiffaat
Naasoqatai: Naasut inerittussaasivillit
Ordeni: Uiffaat orangeanik inerittussallit
Ilaqutai: Siaangasunik pilutallit

Uiffak qunnerarmiu Kalaallit Nunaanni uiffaat nalinginnaanersaraat. Naasarpoq orpigaqarfinni, sivinganerni, qaarsut quppaanni, sisuani paarnaqutaannalinnilu.

Pilutai, kanaartai ineritussaasiviilu
Pilutai takisuunik kanaartallit manissut, amitsukujuut 2-3-nik sippallit kajortunik amitsunik kanaartallit. Pilutai manningasut amitsukujuut sinai killavaartut atimikkut ammalortunik inerittussaasivillit. Inerittussaasivii tamarmik immikkut qallerneqarsimapput assiaqummik ermusiusap affaatut ilusilimmik imaluunniit saagumik nasaasamik katajasumik. Kingunissisarpoq inerittussaasivimmi.

Uiffak siaangasoq

Qallunaatut atia: Tredelt egebregne
Latiinerisut atia: Gymnocarpium dryopteris
Tuluttut atia: Oak Fern
Gruppi: Uiffaat
Naasoqatai: Naasut inerittussaasivillit
Ordeni: Uiffaat orangeanik inerittussalikkut
Ilaqutai: Uiffaat nissallit

Uiffak siaangasoq naasarpoq Kitaani kujasissumi aamma Tunumi kujasissumi paarnaqutaannalinni, orpigaqarfinni, sivinganerni qerrulinnilu.

Pilutai kanaartaalu
Pilutai manissut qorsuk qaamasut 2-3-riarlutik sipiniusallit, takisuunik amitsunnguanik napiasunik qernertunik kanaartallit. Pilutai silittut pingasunik teqeqqullit.

Inerittussai
Pilutami ataasigut inerittussaasiveqarpoq saagoqanngitsunik. Uiffak siaangasoq inerittussaasivinni kingunissisarpoq.