Allernaaraq

Qallunaatut atia: Fyllas rokke
Latiinerisut atia: Raja fyllae
Tuluttut atia: Round skate; Fylla's Ray
Sorlernut ilaava: Aalisakkat
Aalisagaqatai: Allernat
Ilaqutai: Rajidae

Allernaaraq Kalaallit Nunaata kujataani Davis Strædemi Tunullu kujasissuani aammalu Danmarksstrædip kujasissuani uumasuuvoq. 170-2000 meterinik itissusilimmiuuvoq 0 gradiniit kissarnerusumi.

Ilisarnaatai
Siggui naatsuararsuupput, takisuumik paperoqarluni suluusaasa (avaleraasa) sinaat sangujoraartuullutik. Qasertoq kajuartuuvoq akuttusuunik kapinartoqarluni, qimerlumminiit pamiuni ilanngullugu 2-3-nik sanileriiaanik pamiuminut atasunik kapinartoqarluni. Ataatungaa manissuuvoq qasertoq taartunik milalik.

Nerisai
Immap natermiuuvoq, nerisaralugit aalisakkat mikisut assigiinngitsut immap natermiut.

Fyllas rokke - Raja fyllae - Round skate; Fylla's Ray
Paasissutissat
  • Uumaffii: Imaq
  • Takissusia: 55-60 cm
  • Oqimaassusia: 5 kg tikillugu
Nalunngiliuk?
Suaasa puui 2,5 cm-inik silissuseqarput 4 cm-inik takissuseqarlutik. Manissuupput isumikkut nassuusaqaratik. Piarai puuminniit anillakkaangamik 7 cm miss. takissuseqartarput.