Qallunaatut atia: Skærising
Latiinerisut atia: Glyptocephalus cynoglossus
Tuluttut atia: Witch Flounder; Witch
Sorlernut ilaava: Aalisakkat
Aalisagaqatai: Aalisakkat natermiut talerpiatungaat qalliullutik iseqarfillit
Ilaqutai: Oquuttakkut

Oquutarnaq uumasuuvoq Atlantikumi Canadap eqqaani, Kalaallit Nunaata kujataani Europallu avannamut kimmut kitaatungaani Biscayabugtenimiit Norgep Islandillu avannarpasissuannut. Immap naqqani aqitsumi 35-1.500 meterisut itissusilimmiuuvoq.

Ilisarnaatai
Immap natermiuuvoq talerpiatungaa qalliulluni iseqarfilik, isaa saamerleq talerpiatungaanut atalluni. Iseqarfia qasertoq kajuartuuvoq sungaartuulluniluunniit, saneraani titarnera narlusuujulluni. Illuatungaa iseqarfiginngisaa qasertoq qaqorujuttuuvoq qernertunik mikisunik milalik. Timaa amiloruujuvoq takkajaaq.

Nerisai
Nerisarai uumasut immap natermiut mikinerusut, soorlu sangujaat, nerpissuut aammalu uumasut qituttut mikinerusut peqqukujuillu.

Skærising - Glyptocephalus cynoglossus - Witch Flounder; Witch
Paasissutissat
  • Uumaffii: Imaq
  • Takissusia: 28-60 cm
  • Oqimaassusia: 2,5 kg tikillugu
  • Suffisarpoq: upernaaq-ukiaq
Nalunngiliuk?
Aalisagaavoq mamartoq, allanut ilanngullugu pisarineqarajuttoq. Kalaallit Nunaannili ikittuinnaagamik aalisarnermi pingaaruteqanngillat.