Saarullik atamasoq

Qallunaatut atia: Lange
Latiinerisut atia: Molva molva
Tuluttut atia: Ling
Sorlernut ilaava: Aalisakkat
Aalisagaqatai: Saarullikkut
Ilaqutai: Kvabberit imermiut

Saarullik atamasoq Kalaallit Nunaata kujaataani uumasuuvoq immap naqqani manngertumi ujarattuumi. 100-600 meterinik itissusilimmiikkajunneruvoq, 1000 meterilli tikillugit itissusilimmiissinnaalluni. Biscayabugt, Tuluit Qeqertaat, Island Barentshavilu tikillugit aamma uumasuuvoq.

Ilisarnaatai
Qalipaatai assigiinngiiaartuusinnaapput, qalipaatiginerusarlugilli kajuartoq qaserujuttorluunniit, qimerlua taarnerulluni, naavi qaamanerullutik. Avaleraasaasa sinai qaqortuupput, qimerluani avaleraasaata siorliup naatsup tunuatungaa qernertortaqarluni. Alleqqumigut umiisaqarpoq.

Nerisai
Nerisarai peqquit, aalisakkat, nerpissuut, uumasut qituttut amikullu.

Lange - Molva molva - Ling
Paasissutissat
  • Uumaffii: Imaq
  • Takissusia: 200 cm tikillugu
  • Oqimaassusia: 45 kg tikillugu
  • Suai: 20-60 millionit
  • Suffisarpoq: apriili-juuni
  • Kinguaassiorsinnaalersarpoq 5-8-nik ukioqaleraangami
  • Sivisunerpaamik uumasarpoq: ukiut 25
Nalunngiliuk?
Umiisani immap itisuup naqqani taartuinnarmi nerisassarsiorluni atortarpaa. Umiisaa malussarissorujussuuvoq immallu naqqani uumasut assigiinngitsut allat tikkat naasinnaallugu. Saarulliit atamasut nerrersoorujussuupput.