Qallunaatut atia: Hvidskæving
Latiinerisut atia: Lagenorhynchus acutus
Tuluttut atia: White-sided Dolphin
Sorlernut ilaava: Miluumasut
Uumasoqatai: Arferit
Ilaqutai: Aarluarsuit

Aarluarsuk Atlantikup avannaani uumasuuvoq, 50-it missiliorlugit ataatsimoortukkuutaartarlutik, takuneqartarsimappulli ataatsimoortut tusintillit arlaqartut. Aarluarsuk arfeq nujuartuummat qanoq pissusilersortarnera ilisimaneqarpallaanngilaq.

Ilisarnaatai
Aarluarsuk amitsuuvoq naatsumik siggulik. Portusuumik naparutaqarpoq. Alleqqumini quleriinni amitsukujuunik 30-40-nik kiguteqarpoq. Aarluaarsoqatiminut Hvidnæsemik taaneqartartumut assingoqigami tassunga paarlaanneqarajuttarpoq. Aarluarsoqataali Hvidnæse qaallorimmik siggoqarpoq, aarluarsulli saneqqamigut kingusissukkut sungarpaluttumik titarniisaqarluni.

Nerisai
Aarluaarsuup nerisarineruai aalisakkat amikullu.

Hvidskæving - Lagenorhynchus acutus - White-sided Dolphin; Atlantic Whiteside Dolphin
Paasissutissat
  • Uumaffii: Imaq
  • Takissusia: 2-3 m
  • Oqimaassusia: 200 kg tikillugu
  • Aqqarsinnaavoq: 270 m tikillugit
  • Aqqaamasinnaavoq: minutsit 5 tikillugit
  • Ataatsikkut erniusut: 1
  • Piaqqisarpoq: ukioq ataaseq allortarlugu 1
  • Naartusarpoq: qaammatit 11
Nalunngiliuk?
Aarluaarsuit taamaaqatiminnik ilaqarumasarlutillu pinnguarumatuujupput. Ataatsimoortorsuakkuutaartarput assigeeqqissaamillu naluttarlutik, pisserujussuartarlutillu.