Imaneq
Qallunaatut atia: Sandmusling
Latiinerisut atia: Mya arenaria
Tuluttut atia: Soft-shell Clam, Sand Gaper
Sorlernut ilaava: Qituttunut
Uumasoqatai: Imanerit
Ilaqutai: Imanerit
Imanerit ulittarnerup tinittarnerullu killinganniit avammut sioqqani marrarmiluunniit assaallutik uumasuupput. Imanerit inersimanngitsut sioqqanik natilimmi 15-30 cm assaallutik uumasarput. Imanerit inuunertik tamaat inertik qimattanngilaat, inerisimaleraangamik allamut nuussinnaannginnamik.
Ilisarnaatai
Qaleruaat qiterminniit illuttut assigiimmik iluseqatigiinngillat, tumaasaallutik qaavi maniitsuullutik qooruaartuullutillu. Qaleruaat matuinneq ajortut eqqumikkut anersaartuummik ammaneqarput. Inersimasut nukikitsumik mikisumik isigaqarput.
Nerisai
Imanerit naasut sequnneri isaannarnik takussaanngitsut imermiittut milluartarpaat, anersaartuutimikkut milluariarlugit sinneri oriartarlugit.
- Uumaffii: Imaq
- Takissusia: 14 cm tikillugit
- Imanerit angutiviaallutillu arnaviaapput
- Mannii: 3 millionit tikillugit
- Piaraat immap ikerinnaaniittarput
- Sivisunerpaamik uumasarfiat: Ukiut 10-12