Ippernaq

Qallunaatut atia: Sortfodet stikmyg
Latiinerisut atia: Aedes nigripes
Tuluttut atia: Mosquito
Sorlernut ilaava: Sullinernut
Uumasoqatai: Marlunnik sulullit (Tovinger)
Ilaqutai: Ippernat

Ippernaq Kalaallit Nunaanni nalinginnaanersaavoq. Kalaallit Nunaanni sumi tamani uumasuuvoq, pingaartumik aasalernerani kialluni qatsungatillugu amerlalluinnartarlutik.

Ilisarnaatai
Ippernat timaat amitsukujuujupput niui takisuujullutik, suluisa sinaat tattaasaqarlutik, takisuumik kapuuteqarlutik milluaateqarlutillu. Angutiviaq tukattunik meqquusanik maluginiuteqarpoq. Qullugiaat puuliugaangamillu puui sullulimmik anersaartuutitaqarput erngup uninngasup qaavani nivingallutik.

Nerisai
Arnavissat inersimasut naasut tungusunnitsuinik aammillu milluaasartut, angutivissat naasut tungusunnitsui kisiisa milluartarpaat. Qullugiaasa qiviuusatik atorlugit imermi sananeqaatit mikinerpaat milluartarpaat.