Qallunaatut atia: Alk
Latiinerisut atia: Alca torda
Tuluttut atia: Razorbill
Sorlernut ilaava: Timmissat
Timmiaqatai: Naajakkut naloraarusillit
Ilaqutai: Appat

Apparluk Kalaallit Nunaata kitaani siammarsimavoq Nuummiit Qimusseriarsuarmut aammalu Thulemi qeqertani Carey Øerne najorlugit. Kalaallit Nunaanni nalinginnaasumik piaqqiortuuvoq. Apriilimiit aggustimut siumugassaavoq. Piaqqiortarpoq innani timmissat ineqarfiini aammalu sinerissami qaarsuusuni qeqertanilu.

Ilisarnaatai
Apparluup piaqqinerata nalaani niaqua, torlua qatigaalu qernertuusarput. Saava qaqortuuvoq. Apparluup torlua qungasiatalu saneraa ukiukkut qaqortuupput. Sului qaqortortaqarput, siggui portusuujullutik amitsut isaanut atasumik qaqortumik titarniisaqarlutik.

Nerisai
Apparluup nerisarai aalisagaaqqat assigiinngitsut, imaani aqqarluni pisarisakkani.

Paasissutissat
  • Uumaffii: Sineriak imarlu
  • Sului siaarlutik: 63-67 cm
  • Takissusia: 38-42 cm
  • Oqimaassusia: 500-750 gr
  • Sivisunerpaamik uumasarpoq: ukiut 42-t
  • Manniisa amerlassusaat: 1
  • Manniliortarpoq: ukiumut ataasiarluni
  • Ivasarpoq: ullut 26-36
  • Piarai piaraasarput: ullut 14-21
Nalunngiliuk?
Apparluk ulluliorneq ajorami manniliortarpoq qaarsumi quppani, qunneqqani, qangatanerni ujaqqalluunniit ataanni. Taamaammat mannii imaaliallaannaq takusassaanngillat. Angajoqqaat marluullutik mannitik ivasarpaat, piaqqamillu nammineersinnaalernissaasa tungaannut nerlersorlugillu paarisarpaat.
Alk - Apparluk - Alca torda - Razorbill