Qallunaatut atia: Storkjove
Latiinerisut atia: Stercorarius skua
Tuluttut atia: Great Skua
Sorlernut ilaava: Timmissat
Timmiaqatai: Naajakkut naloraarusillit
Ilaqutai: Isunngat

Isunngarujussuaq Kalaallit Nunaata kitaani Tunumilu nalinginnaasumik aqqusaartartuuvoq maajimiit oktobarimut. Kujataaniilli avannamut Disko Bugt tikillugu imaani sikuneq ajortuni, sineriak sinerlugu kangerlunniluunniit qinngortunerusuni takussaanerusarpoq.

Ilisarnaatai
Isunngarujussuaq kajortuuvoq tunumigut qaamanerusunik mikisunik allalik. Sulummi nuuisigut qaqortortani ilisarnaatigai.

Nerisai
Isunngatut allatulli isunngarujussuup timmiaqatini imarmiut allat aalisakkanik nerisaannik arsaartarpai. Timmiaq imarmioq keeriarlugu niaqua immap iluanut naqittaattarpaa, oqummiaminik oriaanissaa tikillugu. Aammali nammineq aalisagarniarsinnaavoq, kiisalu timmissat mikisut aalisakkallu perlukui nerisarlugit.

Storkjove - Stercorarius skua - Great Skua
Paasissutissat
  • Uumaffii: Sineriak imarlu
  • Sului siaarlutik: 125-140 cm
  • Takissusia: 50-58 cm
  • Oqimaassusia: 1,2 – 1,65 kg
  • Sivisunerpaamik uumasarpoq: ukiut 32
  • Manniisa amerlassusaat: 2
  • Manniliortarpoq: ukiumut ataasiarluni
  • Ivasarpoq: ullut 29 miss.
  • Piarai piaraasarput: ullut 42-49
Nalunngiliuk?
Isunngarujussuit Kalaallit Nunaanni piaqqiorneq ajorput. Savalimmiuni, Svalbardimi, Islandimi Skotlandillu avannarpasissuani amerlasoorsuakkuutaarlutik piaqqiortarput. Afrikap Amerika Kujalliulluunniit avataanni ukiigajuppoq.