Qallunaatut atia: Thorshane
Latiinerisut atia: Phalaropus fulicarius
Tuluttut atia: Grey Phalarope; Red Phalarope
Sorlernut ilaava: Timmissat
Timmiaqatai: Naajakkut naloraarusillit
Ilaqutai: Saarfaarsukkut

Kajuaraq Tunup avannaani Ittoqqortoormiiniit Germania Landimut tatsit mikisut eqqaanni naggorissuni piaqqiortarpoq. Kalaallit Nunaata kitaata avannaani qeqertaaqqani, sinerissami pukkitsumi sinerissamilu tasinngortani aamma piaqqisarpoq. Kalaallit Nunaata sinnerani qaqutigut aqqusaartarpoq. Juuni-septembarimi takussaasarpoq.

Ilisarnaatai
Piaqqinermi nalaani saava aappaluttoq kajuartuusarpoq, tunua qernertuulluni tukimut sungarpaluttunik titarniisaqarluni, niaqua qernertuusarpoq uluai qaqortuullutik, siggui sungaartuullutik nuui taartut. Ukiukkut tunua tungujortoq qaserujuttuusarpoq isaasa eqqaat tunummut qernertuulluni.

Nerisai
Nerisarai sullerngit, qullugissat, peqquit mikisut, uumasuaqqat isaannarnik takuneqarsinnaanngitsut aalisagaaqqallu.

Thorshane - Phalaropus fulicarius - Grey Phalarope; Red Phalarope
Paasissutissat
  • Uumaffii: Qaqqat, Sineriak imarlu
  • Sului siaarlutik: 36-41 cm
  • Takissusia: 20-22 cm
  • Oqimaassusia: 50-75 g
  • Manniisa amerlassusaat: 4
  • Manniliortarpoq: nalinginnaasumik ukiumut ataasiarluni
  • Ivasarpoq: ullut 18-20
  • Piarai piaraasarput: ullut 16-18
Nalunngiliuk?
Kajuaqqat angutivissat arnavissatut qalipaatigissaartiginngillat. Arnavissat “aalajangiisuusarput”, taamaattumik angutivissat ullutik paarisarpaat, mannitik ivasarlugit piaqqatillu paarisarlugit. Naluumasortut aamma taamaapput.