Qallunaatut atia: Hættemåge
Latiinerisut atia: Chroicocephalus ridibundus
Tuluttut atia: Black-headed gull
Sorlernut ilaava: Timmissat
Timmiaqatai: Naajat naloraarusillit
Ilaqutai: Naajakkut

Nasalik Kalaallit Nunaata kitaani avannamut Disko Bugt tikillugu aasakkut tikittarput aammalu aallartartuullutik, Kitaata kujataani ikittunnguullutik piaqqisarlutik. Sinerissani avammut ammaannartuunngitsuni, qeqertani qeqertaaqqanilu amerlasuukkuutaarlutik piaqqiortarput.

Ilisarnaatai
Tunua suluilu qasertuupput, suluisa sinaat qernertuullutik. Meqquisa sinneri qaqortuupput. Siggui isigaalu aappaluttuupput. Piaqqiornerminni kajortumik niaqua nasaasaqalersarpoq, ukiukkut niaquata sinnera qaqortuulluni isaasa tunui taartumik milaqarlutik.

Nerisai
Nerisai assigiinngiiaartuupput, qullugissat, sullerngit, silut, aalisagaaqqat, peqquit, siuteqqut aamma illoqarfinni eqqaavissuarnilu igitat.

Hættemåge - Chroicocephalus ridibundus - Black-headed gull
Paasissutissat
  • Uumaffii: Sineriak imarlu
  • Sului siaarlutik: 90-105 cm
  • Takissusia: 34-37 cm
  • Oqimaassusia: 225-350 g
  • Sivisunerpaamik uumasarpoq: ukiut 30
  • Manniisa amerlassusaat: 2-3
  • Manniliortarpoq: ukiumut ataasiarluni
  • Ivasarpoq: ullut 23-36
  • Piarai piaraasarput: ullut 35
Nalunngiliuk?
Nasalik aallartartuuvoq, nalinginnaasumik Islandimut, Amerika Avannarlermut Europallu avannaata kitaanut. Ikittuinnannguit Kalaallit Nunaat qimattanngilaat. Kalaallit Nunaata kitaata avataani sikuneq ajortuni ukiisarput.