Algit

Qallunaatut atia: Tvedelt rødflig
Latiinerisut atia: Fimbrifolium dichotomum
Tuluttut atia: Fimbrifolium
Gruppi: Algit
Naasoqatai: Aappilattukkut
Ordeni: Gigartinales
Ilaqutai: Cystocloniaceae

Aappaluttunnguit immap naasuinut aappaluttunut ilaavoq, tinigunneq ajortumi immap qaavaniit 30-40 meterit tikillugit nassaassaasoq.

Ilisarnaatai
Aappaluttunnguit pilutaat assigiissaartunik ajassaatitut iluseqartuupput, pilutaasa annerusut sinaat killavaartuullutik. Sinerissami avammut ammaannartumiittut pilutaat anginerusarput. Kangerluit qinngorpasissuiniittut pilutaat aminnerungaatsiartarput, immallu naasua taanna ujaluusaanerusutut isikkoqarsinnaasarluni.

Aappilattut

Aappilattut

Qallunaatut atia: Søl
Latiinerisut atia: Palmaria palmata
Tuluttut atia: Dulse, Dilsk
Gruppi: Algit
Naasoqatai: Aappilattukkut
Ordeni: Bangiales
Ilaqutai: Palmariaceae

Aappaluttut immap naasorai proteininik, vitamininik aatsitassanillu akoqarluartut. Panertillugit tamulunneqarsinnaapput. Naasarput ulittarlunilu tinittartumi tininneq ajortup qaatungaaniunerusoq. Naasarput qaarsumi, ujarassuarni qeqqussanilu.

Ilisarnaatai
Pilutai siaangasut aapaluttuupput ilai nutaanerit ilai pisoqaanerit, pilutaasa pisoqaanerit sinaasigut nutaaliortarluni. Nipittaatiminik nipinngasarpoq.

Ameraasaq aappaluartoq

Qallunaatut atia: Rød purpurhinde
Latiinerisut atia: Porphyra purpurea
Tuluttut atia: Purple Laver Seaweed (Red Nori)
Gruppi: Algit
Naasoqatai: Aappilattukkut
Ordeni: Bangiales
Ilaqutai: Bangiaceae

Ameraasaq aappaluartoq nerineqarsinnaavoq, sushini tangbrødinilu akugalugu. Tinittarnerup ulittarnerullu killinganni atsissumi tininneq ajortup qaatungaani naasarpoq. Ujaqqani, immap naasuini allani kaattungiiaanilu nippusimasarpoq.

Ilisarnaatai
Pilutai siaangasut ammalungajallutik sillajaarlutik amitsukujuut, saattut aappalungusersumiit aappillarissut qaserujuttut. Pilutai tunngavimminnut nipinngapput. Nipinngassutaani ataatsimi piluttat arlaqarsinnaapput.

Equutit

Qallunaatut atia: Blæretang
Latiinerisut atia: Fucus vesiculosus
Tuluttut atia: Bladderwrack
Gruppi: Algit
Naasoqatai: Equutikkut qeqqussakkullu
Ordeni: Fucales
Ilaqutai: Equutikkut

Equutit immap naasorai kajortut mattusuut tinittarlunilu ulittartumi naasartut tinigunneq ajortoq tikillugu. Equutit nalinginnaapput Kitaani allorniusaq avannarleq 76⁰ tikillugu. Sorlaqanngillat inuussutissaminnilli pisarlutik fotosyntese iluaqutigalugu pilutamik qaavani. Qaarsumi, ujaqqani uillulluunniit qaleruaanni nipinngagajupput.

Ilisarnaatai
Immap naasorai kajortut issukullaat mattusuut pilutai saannerusut avissaartitertut. Pullartaqartarput qitermikkut illugiiaanik.

Immap issuatsiaa aappaluttoq

Qallunaatut atia: Rødt sømos
Latiinerisut atia: Rhodochorton purpureum
Tuluttut atia: Red Sea Moss
Gruppi: Algit
Naasoqatai: Aappilattukkut
Ordeni: Acrochaetiales
Ilaqutai: Acrochaetiaceae

Naasarpoq pingaartumik ulittarlunilu tinittartumi mallerajuttumilu ujaqqani qaarsunilu, pilutaasa qaatungaat meqquluaasanittarlutik. Immap naasua taanna ujalussiaasaqarpoq allequtaanut nipputtartunik, tassanngaanniillu ujalussiaasaqarluni avissaartiterlutik imaani alliartortartunik.

Ilisarnaatai
Pilutai aappalungusersut amitsuaraallutik killavaartut. Naaffitsik tamaviat qallersinnaavaat issuatsiaaqarfinnut eqqaanarninngorlugu.

Immap salaatia taarneq

Qallunaatut atia: Mørk fjordsalat
Latiinerisut atia: Ulvaria splendens
Tuluttut atia: Dark Sea Lettuce
Gruppi: Algit
Naasoqatai: Quajaatit
Ordeni: Ulvales
Ilaqutai: Monostromataceae

Immap salaatia taarneq naasarpoq sinerissami immap ikerani tinigunneq ajortumi qaarsunilu taseqqani immap qarsuasagaani. Immap salaatia taartoq suppani salaatinilu akugineqarsinnaavoq. Immap salaatia taartoq fotosyntese iluaqutigalugu piluttami qaatigut inuussutissaminik pisarpoq.

Ilisarnaatai
Immap salaatia taarnerup immap salaatianiit (søsalat) allaanerussutigaa cellii qaleriiunnginnamik, taamaattumillu qorsummik taartumik qalipaateqarluni.

Immap uiffaa

Qallunaatut atia: Tandet fjertang
Latiinerisut atia: Ptilota serrata
Tuluttut atia: Northern Sea Fern
Gruppi: Algit
Naasoqatai: Aappilattukkut
Ordeni: Ceramiales
Ilaqutai: Ceramiaceae

Immap uiffaa immap naasoraa aappaluttoq naasartoq imaani tinigunneq ajortup qaatungaani 50 meterit tikillugit itissusilimmi. Immap uiffaa allorniusaq avannarleq 79⁰ tikillugu nalinginnaavoq. Sorlaqanngilaq, piluttamili qaatungaatigut inuussutissaminik pisarluni. Ujaqqani, qaarsuni, uillut qaleruaanni imaluunniit immap naqqata uumasuini nippusimasarpoq.

Ilisarnaatai
Immap uiffaata piluttani meqqutut ilusillit avaleraasatut kusanartumik siaangasut ilisarnaatigai.

Inaluusat

Qallunaatut atia: Pølsetang
Latiinerisut atia: Scytosiphon lomentaria
Tuluttut atia: Soda Straws
Gruppi: Algit
Naasoqatai: Equutikkut qeqqussakkullu
Ordeni: Dictyosiphonales
Ilaqutai: Scytosiphonaceae

Inaluusat immap naasorai equutikkunnut qeqqussanullu ilaasut, tinittarfiup avasinnerpaaffiani tininnerullu angumanngisaata qanittuani naasartut. Inaluusat Kalaallit Nunaanni nalinginnaaqaat, allorniusarlu avannarleq 74⁰ tikillugu naasarlutik.

Ilisarnaatai
Inaluusat pilutaqarput olivenitut qorsunnik qalipaatilinnik takisuunik amitsuaqqanik, 30 cm tikillugit takissuseqarsinnaasunik. Pilutai imaani nappaarittarput, sulloqarlutik ungersoraartuugajuttuusarlutillu. Inaluusat ujaqqanut uillullu qaleruaannut nippusimagajuttuusarput.

Nagguaasalik

Qallunaatut atia: Arktisk ledtang
Latiinerisut atia: Polysiphonia arctica
Tuluttut atia: Pretty Polly
Gruppi: Algit
Naasoqatai: Aappilattukkut
Ordeni: Fucales
Ilaqutai: Klørtangikkut

Nagguaasalik immap naasoraa aappaluttoq itisoorsuarmiu, qeqqussanut allanut nippusimagajuttoq. Nagguaasalik immap naasoraa aappaluttoq nalinginnaasoq 20 cm-it tikillugit takitigaluni orpikkatut avaleraarluni naasartoq. Kanaartaarai nagguaasaqarput. Nagguaasalik Kalaallit Nunaata imartaani kujasissumiit allorniusaq avannarleq 78⁰ tikillugu siumugassaavoq.

Ilisarnaatai
Nagguaasalik ujalussiatut ilusilinnik siallutik naasunik nagguaasaqarpoq, taamaalillunilu aappaluttumik kajuartumik qalipaateqartutut orpikkatut pissusilittut mikisunnguatut kusanartunik avalequteqartutut isikkoqarluni.

Nujaasat taartut

Qallunaatut atia: Purpurtråd
Latiinerisut atia: Bangia fuscopurpurea
Tuluttut atia: Black Sea-hair
Gruppi: Algit
Naasoqatai: Aappilattukkut
Ordeni: Bangiales
Ilaqutai: Bangiaceae

Nujaasat taartut immap naasorai mikisut ujalussiatut ilusillit, assigiinngitsunut nippussimallutik qalliisinnaasut. Nujaasat taartut ulittarnerup tinittarnerullu killinganiittuupput, sumiiffiillu naaffitik aappaluttoq kajuartunngortissinnaasarpaat. Nujaasat taartut mallersartoq uummaariffigisarpaat, tarajoqarluartorlu sapernagu. Imermi tarajoqanngitsumi aamma naasinnaapput, kuunnilu kuulluartunik aamma nassaassaasarput.

Ilisarnaatai
Nujaasat taartut 15-cm-isut takitigilersinnaasunik amitsunnguanik avalequteqanngitsunik ujaluusaqarput, nujaasaqarput.

Pamiuusaq taartoq

Qallunaatut atia: Sort ulvehaletang
Latiinerisut atia: Rhodomela lycopodioides
Tuluttut atia: Straggly Tail Weed
Gruppi: Algit
Naasoqatai: Aappilattukkut
Ordeni: Ceramiales
Ilaqutai: Rhodomelaceae

Pamiuusaq taartoq immap ulittarfiata tinittarfiatalu akornanniikkajuttuuvoq, aamma qaarsut taseraanniittarluni. Taanna Kalaallit Nunaata sineriaani siaruarsimasuuvoq, avannarpiaa minillugu.

Ilisarnaatai
Pamiuusaq taartoq ataatsimik arlalinnilluunniit qitiusumik kanaartaqarpoq suangasuumik avalequteqarluartumillu. Pilutaani naarlaavisa isuanni meqquaqqanik naasoqarajuttarpoq. Immap naasua taanna qernerluinnartuugajuttarpoq.

Pilutakkaaq

Qallunaatut atia: Bugtet ribbeblad
Latiinerisut atia: Phycodrys rubens
Tuluttut atia: Common Sea Oak
Gruppi: Algit
Naasoqatai: Aappilattukkut
Ordeni: Ceramiales
Ilaqutai: Delesseriaceae

Pilutakkaaq tininnerup angusanngisaani itissutsini assigiinngitsorpassuarni naasarpoq. Immap qaavanut qanittumiittut amitsunik pilutaqartut itinerusumiittut silinnerulluartunik pilutaqarput. Pilutakkaaq 40 meterit tikillugit itissusilik tikillugu tininneq ajortumi naasuuvoq.

Ilisarnaatai
Pilutakkaap ilisarnaatigaa pilutaqarami orpiup manngertup pilutaanut assingusunik. Pilutakkaaq aappaluttuuvoq piluttami aappaluttumik qalipaateqaataat pissutigalugu.

Pullartaatsoq

Qallunaatut atia: Langfrugtet klørtang
Latiinerisut atia: Fucus evanescens
Tuluttut atia: Knotted wrack
Gruppi: Algit
Naasoqatai: Equutikkut qeqqussakkullu
Ordeni: Fucales
Ilaqutai: Klørtangikkut

Pullartaatsoq naasarpoq ulittarnerup tinittarnerullu killinganniit tinigunneq ajortup qaatungaa tikillugu. Umiarsualivinni naalluartarpoq.

Ilisarnaatai
Amitsumik kajortoq qaamasumiit olivenitut qorsorpaluttunik siaartitertunik pilutaqarpoq qitimigut ersarissumik quassugaasaqarluni. Kinguaassiuutai naarlaat nuuiniittut pullartaapput takisuut. Arnaviaallutillu angutiviaapput. Equutinut pullartaqanngitsunut assingusinnaavoq.

Putoortut

Qallunaatut atia: Hultang
Latiinerisut atia: Agarum clathratum
Tuluttut atia: Sieve Kelp
Gruppi: Algit
Naasoqatai: Equutikkut qeqqussakkullu
Ordeni: Laminariales
Ilaqutai: Costariaceae

Putoortut Kalaallit Nunaata sineriaani qeqquarpassuit nalinginnaanerpaat ilagaat amerlasoorsuusinnaasut. Tininneq jortumiit 15-40 meterit tikillugit itissusilimmiuuvoq. Nukissaq katersorsimasani ukiukkut inuussutigisarpaa. Nukissaq aasakkut pisarpaa fotosyntese iluaqutigalugu.

Ilisarnaatai
Qeqqussatut, equutitut sulluitsutulli putoortut immap naqqanut nippusimasarput kanaartaminni nipputtaatit atorlugit. Kanaartaa quassugaasatut tanneranoorpoq. Ilisarnaatigai piluttani putoortut.

Qaarutaasat

Qallunaatut atia: Almindelig båndtang
Latiinerisut atia: Petalonia fascia
Tuluttut atia: Sea Petals
Gruppi: Algit
Naasoqatai: Equutikkut qeqqussakkullu
Ordeni: Scytosiphonales
Ilaqutai: Scytosiphonaceae

Qaarutaasat naasarput tinittartumi ulittartumilu, qaarsut taserartaanni aammalu tinittarnerup angusanngisaata qaavata tungaani.

Ilisarnaatai
Qaarutaasat pilutai ujalussiaasaapput assigiinngitsunik naaffiat apeqqutaalluni takissuseqarlutillu silissusillit. Ikkattumi aalaneq ajortumi pilutai naatsuupput silittut, imaanili aalanerusartumi tannerullutillu aminnerusarlutik. Pilutai kanaartannguaniittut nipputtartoqarput.

Qanallarnaq

Qallunaatut atia: Skive-bladtang
Latiinerisut atia: Laminaria solidungula
Tuluttut atia: Arctic Suction-cup Kelp
Gruppi: Algit
Naasoqatai: Equutikkut qeqqussakkullu
Ordeni: Qanallarnat
Ilaqutai: Qanallarnakkut

Qanallarnaq immap naasoraa kajortoq, tinittarnerup ulittarnerullu killingata avataani ujaqqanik natilimmi avasiartumi. Qanallarnaq nukissaminik sukkulinnik katersisarpoq aasakkut fotosyntese iluaqutigalugu. Ukiukkut sikulluni qaamaneerukkaangat nukissaq katersorsimasani alliartuutigisarpaa.

Ilisarnaatai
Kuultiusamiit kajuartuuvoq manissumik pilutaqarfeqarluni. Qanallarnanit allaniit (qeqqussanit, uisunnit, putoortunit aammalu sulluitsunit) immikkoorutigaa immap naqqanut nipinngasuugami.

Qanallassuaq

Qallunaatut atia: Arktisk sækkrod (Kravetang)
Latiinerisut atia: Saccorhiza dermatodea
Tuluttut atia: Furbellow
Gruppi: Algit
Naasoqatai: Equutikkut qeqqussakkullu
Ordeni: Laminaria
Ilaqutai: Sækrodfamilien

Qanallassuaq tininnerup anguneq ajugaani 2 aamma 20 meterit akornanni itissusilimmi naasarpoq. Qeqqussatut angisuutut allatulli torsusoorsuanngorluni naasinnaavoq. 20 meterit tikillugit itissusilimmi naasarpoq, itinerusumili fotosyntesemut qaamaneq annikippallaalersarpoq.

Ilisarnaatai
Qanallassuaq kanaartami ataatungaatigut nigaqarpoq, tassanngaanniillu ujaluusat nipinngatit aallaaveqarput.

Qeqquaq

Qallunaatut atia: Langstilket bladtang
Latiinerisut atia: Saccharina longicruris, Laminaria longicruris
Tuluttut atia: Northern Rhizome Kelp/Atlantic Kelp
Gruppi: Algit
Naasoqatai: Equutikkut qeqqussakkullu
Ordeni: Qeqqussat
Ilaqutai: Qeqqussakkut

Qeqquaq eqquutikkunnut qeqqussakkunnullu ilaavoq Kalaallit Nunaata sineriaani 4-12 meterit tikillugit itissusilimmi, Kitaani allorniusap avannarliup 62⁰ allorniusallu sanimukartup 82⁰ akornanni naasoq. Oqquartaanerusuni kangerluillu paatungaanni amerlasoorsuullutik naasarput. Ukiukkut imaq sikugaangat seqernup kissarneranik amigaateqaleraangamik nukissaq katersorsimasartik iluaqutigalugu alliartortarput.

Ilisarnaatai
Qeqquaq kanaartaqarpoq 5-7 meterinik takissuseqalersinnaasoq sulloqartoq. Pilutaasa 60 cm-isut silitsigisut sinaat eqingasulittuupput. Immap naqqanut nipinngassutigai kanaartaminiittut nukerussat.

Qernaluk

Qallunaatut atia: Sortfods Bladtang
Latiinerisut atia: Laminaria nigripes
Tuluttut atia: Black-foot Kelp
Gruppi: Algit
Naasoqatai: Equutikkut qeqqussakkullu
Ordeni: Qanallaat
Ilaqutai: Qanallakkut

Qernaluk ulittarnerup tinittarnerullu killinganni tininnerpaasarfiata killingani naasarpoq. Kangerluit qinnguini qaqutigoortuuvoq, allorniusarlu avannarleq 70⁰ killinga tikillugu sumiissusersineqarsimalluni. Qernaluk sorlaqanngilaq, fotosyntese atorlugu piluttami qaavisigut inuussutissaminik pisarluni. Nipinngagajuttuusarpoq ujaqqani, qaarsumi uillulluunniit qaleruaanni.

Ilisarnaatai
Qernaluk sipiniusalimmik pilutaqarfeqarpoq 80 cm-isut takissuseqarluni 30 cm-isullu silissusilimmik. Kanaartaa issukullaavoq, pilutaqarfiata ataatungaa kanaartaalu qernertuullutik, sinneralu sungaartoq kajuartuuvoq.

Qiviuusat

Qallunaatut atia: Almindelig dunalge
Latiinerisut atia: Pylaiella littoralis
Tuluttut atia: Sea Felt
Gruppi: Algit
Naasoqatai: Equutikkut qeqqussakkullu
Ordeni: Ectocarpales
Ilaqutai: Acinetosporaceae

Qiviuusat nalinginnaapput naasarlutik tinittarnerup ulittarnerullu killinganni aammalu tininneq ajortup qaatungaani. Naasinnaapput klørtangin sapangaasanilu nipinngallutik ipifytitut. Epifyt naasuupput naasuni allani nipinngasartut inuussutissaminnik nipinngaffitik milluaaffiginngikkaluarlugit.

Ilisarnaatai
Qiviuusat ujalussiaasanik avalequtaasanik pilutaqarput. Akileriiaanik siaangasunik avalequtitaartortarpoq. Qiviuusat ilannikutut naagajupput.

Qiviuusat qorsuit

Qallunaatut atia: Kroggrenet grønkugle
Latiinerisut atia: Acrosiphonia arcta
Tuluttut atia: Arctic Sea Moss
Gruppi: Algit
Naasoqatai: Quajaatit
Ordeni: Ulotrichales
Ilaqutai: Ulotrichaceae

Qiviuusat qorsuit immap naasorai naasartut tinittarnerup ulittarnerullu killinganni tininneq ajortup qaatungaani.

Ilisarnaatai
Qiviuusat qorsuit ivikkatut eqimattatut sorlamminni ujalussiaasanik katiguteqarput. Eqimattai avalequtaasaapput torsusuut, qummut tikkungasut ujalussiaasat ataasiakkaat. Qarsorsanut eqqaanartunik nutaaliortarput. Cellii silissutsimik quleriaataa tikillugu takissuseqarsinnaapput.

Qooqqinertooq

Qallunaatut atia: Kile-rødblad
Latiinerisut atia: Coccotylus truncatus
Tuluttut atia: Coccotylus
Gruppi: Algit
Naasoqatai: Aappilattukkut
Ordeni: Gigartinales
Ilaqutai: Phyllophoraceae

Qooqqinertooq imaani itisuumi nalinginnaavoq. Immap naasuisa Kalaallit Nunaanni avannarpasinnerusuani aamma naasartuusut ilagaat. Itisuumi qaamanikitsumi naajumasuuvoq. Kangerlunni marullummik natilinni nippuffissaqanngitsuni aamma naasarpoq.

Ilisarnaatai
Naatsumik ulamertumik kanaartaqarpoq pilutai qussaatitut ilusillit siaangallutik. Pilutaasa sinaanni takussaagajupput kingunissai qernertut.

Quajaatit avaleraartut

Qallunaatut atia: Rørhinde
Latiinerisut atia: Enteromorpha prolifera
Tuluttut atia: Branched String Lettuce
Gruppi: Algit
Naasoqatai: Quajaatit
Ordeni: Ulvales
Ilaqutai: Ulvaceae

Quajaatit ilaat quajaatit avaleraartut assigiinngitsunik iluseqarput, apeqqutaalluni sineriak mallerajuttuunersoq imaluunniit mallerajuttuunnginnersoq. Allorniusaq avannarleq 79⁰ tikillugu sineriammiuuvoq.

Ilisarnaatai
Sinerissami mallerajuttuunngitsumi pilutai 8 mm-it tikillugit diametereqarput 15 cm-illu tikillugit takissuseqarlutik, sinerissami mallerajunnerusumi naasartut pilutai 2 mm-isut silitsigilersarput 10 cm-isullu takitigilersarlutik.

Quajaatit torsusuut

Qallunaatut atia: Klippe-vandhår
Latiinerisut atia: Cladophora rupestris
Tuluttut atia: Cladophora
Gruppi: Algit
Naasoqatai: Quajaatit
Ordeni: Vandhårordenen
Ilaqutai: Vandhårfamilien

Quajaatit torsusuut naasarput tinittarnerup ulittarnerullu killingata ataatungaani mallerajuttuunngitsumi aammalu qaarsut quppaanni. Imaani inuussutissaqarluartumi naalluartarput. Fotosyntese atorlugu piluttami qaavisigut inuussutissaminnik pisarput.

Ilisarnaatai
Ilisarnaatigaat ujalussiaasamik qalipaataat qorsuk taartorujussuaq. Qaarsuni imaanut ujangiuttuni oqquartaasuni torsusoorsuanngorlutik naasarput.

Saattuaqqat

Qallunaatut atia: Kræmmerhusalge
Latiinerisut atia: Monostroma grevillei
Tuluttut atia: Sea Cellophane
Gruppi: Algit
Naasoqatai: Quajaatit
Ordeni: Ulotrichales
Ilaqutai: Gomontiaceae

Saattuaqqat naasarput tininneq ajortumi imaani ikkattumi aalaneq ajortumi. Pilutai nerineqarsinnaagamik suppani salaatinilu akugineqarsinnaapput. Inuussutissaminnik pisarput piluttamik qaavisigut fotosyntese atorlugu. Nippusimagajupput ujaqqani, qaarsuni uillulluunniit qaleruaanni, aammali immap naasuini allani naasinnaallutik.

Ilisarnaatai
Qorsuupput imaluunniit qorsuk sungarpaluttuupput. Pilutai cellit qaleriiunngillat.

Sapangaasat

Qallunaatut atia: Buletang
Latiinerisut atia: Ascophyllum nodosum
Tuluttut atia: Norwegian Kelp, Knotted Kelp
Gruppi: Algit
Naasoqatai: Equutikkut qeqqussakkullu
Ordeni: Laminariales
Ilaqutai: Laminariaceae

Sapangaasat naasarput sinerissami aalagajuttuunngitsumi qaarsuni tinittarnerup ulittarnerullu killinganniit tininneq ajortoq tikillugu. Kitaani allorniusaq avannarleq 72⁰ tikillugu naasarpoq. Qaanngumi qerrusimalluni ukiisarpoq.

Ilisarnaatai
Sapangaasat immap naasorai olivenitut qorsorpaluttut, silittunik tassiisanik avalequtaasanik pilutallit. Naarlaavi ulamertunik angisuunik silaannalinnik pullartaqarput aammalu paarnanut stikkelsbærinut mikisunut eqqaanartunik sungarpaluttunik inerittussaqarlutik. Kalaallit Nunaanni aasakkut inerittussaqalersarput.

Sulluitsoq

Qallunaatut atia: Vingetang
Latiinerisut atia: Alaria esculenta
Tuluttut atia: Dabberlock; Winged Kelp
Gruppi: Algit
Naasoqatai: Equutikkut qeqqussakkullu
Ordeni: Ectocarpales
Ilaqutai: Chordariaceae

Sulluitsoq Kalaallit Nunaata sineriaani avallerni mallerajuttuni naagajuppoq. Sulluitsup qanallakkut ilaata nukissaq aasakkut fotosyntese atorlugu pisimasani ukiukkut alliartuutigisarpaa.

Ilisarnaatai
Sulluitsoq immap naqqanut nippusimasarpoq kanaartamini nipputtatiminik. Kanaartaa qeqqaniittoq erseqqissuuvoq. Kanaartami sinaasigut pilutaqarpoq inerittussaasivinnik tamarmik immikkut inerittussaararpassualinnik.

Suloqqat

Qallunaatut atia: Almindelig pisketang
Latiinerisut atia: Chordaria flagelliformis
Tuluttut atia: Northern Rhizome Kelp
Gruppi: Algit
Naasoqatai: Equutikkut qeqqussakkullu
Ordeni: Chordariales
Ilaqutai: Chordariaceae

Kalaallit Nunaanni suloqqat assigiinngitsut marluupput. Suloqqat nalinginnaasut nalinginnaanerupput umingasut akornanni tinigunneq ajortumi ikkattumi naasarlutik. Umingasut suloqqani epifytitut nippusimagajupput. Epifyt tassaavoq naasumi allami nippusimasartoq inuussutissaminik piffigisanngikkaluarlugu.

Ilisarnaatai
Suloqqat nalinginnaasut pilutai torsusuujupput, issusuut taartut qeqqa naatsoq takisuunik avalequtilik. Inerittussaasiveqarpoq.

Tartunga

Qallunaatut atia: Nyretang
Latiinerisut atia: Turnerella pennyi
Tuluttut atia: Red Sea-cabbage
Gruppi: Algit
Naasoqatai: Aappilattukkut
Ordeni: Gigartinales
Ilaqutai: Furcellariaceae

Tartunga naasarpoq itingaatsiartumi angisuunik qanallaqarfiusumi. Naasarput 15-20 meterisut ititigisumi immap naasuisa kajortut ataatsimoortorsuakkuutaartut naasarfiisa killinganni. Kalaallit Nunaata sineriaani allorniusaq avannarleq 78⁰ tikillugu naasarpoq.

Ilisarnaatai
Tartunga pilutangasunik avalequteqarpoq naarlaat avalequtaat tartungasuullutik, pisoqaanerni assigiiaannginnerullutik. Pilutaat aalajangersumik iluseqartuunngillat.

Tukattoq

Qallunaatut atia: Blød kællingehår
Latiinerisut atia: Desmarestia viridis
Tuluttut atia: Stringly Acid Kelp
Gruppi: Algit
Naasoqatai: Equutikkut qeqqussakkullu
Ordeni: Desmarestiales
Ilaqutai: Desmarestiaceae

Tukattoq immap naasoraa equutikkunnut qeqqussakkunnullu ilaasoq ujalussiaasanik pilutallit. Eqqusat mangiaaffiini tukattoq kingulerukkajuttartuuvoq. Tamatumunnga pissutaasorineqarpoq celliisa isserisa syreqarnerat.

Ilisarnaatai
Tukattup ilisarnaatigaa avalequtimi kanaartaat ulamertoq takisooq, avalequtaalu akileriiaarlutik inissisimapput. Aserorneqaraangami nunamulluunniit pisinneqaraangami qorsuk taartunngortarpoq, tassa cellemi syreqarluarnerat pissutigalugu.

Uisuk

Qallunaatut atia: Sukkertang
Latiinerisut atia: Sacharina latissima
Tuluttut atia: Sugar kelp
Gruppi: Algit
Naasoqatai: Equutikkut qeqqussakkullu
Ordeni: Ectocarpales
Ilaqutai: Chordariaceae

Uisuk immap naasoraa kajortoq Kalaallit Nunaata sineriaani nalinginnaasoq 2-30 meterinik itissusilimmi naasartoq. Nukissaq (stoffit sukkullit) katersorsimasani ukiukkut inuussutigisarpaa imaq sikugaangat. Fotosyntese atorlugu aasakkut nukissamik pisarpoq.
Eqimattassuakkuutaarluni naasarami immap naqqani orpipassuarnut eqqaanarsinnaasarpoq.

Ilisarnaatai
Naatsukullammik sillajaamik takisuumik maligaasiortumik kanaartaqarpoq. Qeqqussatut, sulluitsutut putoortutullu ujaqqani qaarsumilu nippusimasarpoq kanaartamini nipputtartut atorlugit.

Ujaluusat

Qallunaatut atia: Strengetang
Latiinerisut atia: Chorda filum
Tuluttut atia: Spaghetti Kelp
Gruppi: Algit
Naasoqatai: Equutikkut qeqqussakkullu
Ordeni: Laminariales
Ilaqutai: Chordaceae

Ujaluusat annerusumik naasarput qeqqussat annerusut immap naqqanut nippuffigisinnaanngisaanni, soorlu ujaraaralimmi sioralimmiluunniit. Allorniusaq avannarleq 78⁰ tikillugu naasarput.

Ilisarnaatai
Pilutartaartorneq ajorpoq, tamakkerluni ujaluusaalluni avalequteqanngitsuulluni.

Umingasut

Qallunaatut atia: Skægtang
Latiinerisut atia: Dictyosiphon foeniculaceus
Tuluttut atia: Golden Sea Hair
Gruppi: Algit
Naasoqatai: Equutikkut qeqqussakkullu
Ordeni: Ectocarpales
Ilaqutai: Chordariaceae

Umingasut naasarput tininneq ajortumiit itisoorsuaq tikillugu. Naasarput qaarsuni immap naasuini allani, soorlu qiviuusani suloqqanilu.

Ilisarnaatai
Kajortoq qaamasumiit guultiusatut kajortuupput agguluttuullutik. Agguluttuuneri assigiinngiiaartuupput naaffiat apeqqutaalluni. Kingunissiuleraangamik kajortut taartunik ataasiakkaanik inerittussaasivinittarput kajortut taartunik piluttamik iluiniittunik.