ORPIIT ORPIKKALLU - SUMI TAMAANI

Qallunaatut atia: Kryblyng
Latiinerisut atia: Loiseleuria procumbens
Tuluttut atia: Alpine Azalea
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Aappaluttunnguit orpigaapput pukkitsut torsullutik naasartut paarnaqutaannalinni inuussutissaqarluanngitsuni qatsissumilu.

Avalequtai pilutaalu
Avalequteqarpoq nalasunik imaluunniit orlingasunik pilutai akileriiaarlutik. Pilutai tumaasat issusuut, pilutaasa sinai ammut imusut, ataatungaat qaamasunik meqqullit.

Sikkersui inerittuilu
Sikkersui sianiusat aappaluartut qeqqi kanaartaalu aappaluttut taartut. Naatsiiassaasivia ammallorissoq aappaluttoq.

Avaalagiaq

Avaalagiaq

Qallunaatut atia: Dværg-birk
Latiinerisut atia: Betula nana
Tuluttut atia: Dwarf Birch
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Orpiit qisussiassakkut
Ilaqutai: Orpiit (Avaalaqiakuluut)

Avaalaqiaq orpigaavoq naasartoq paarnaqutaannalinni, qatsissumi masarsummilu.

Avalequtai pilutaalu
Pilutai akuttusuut, qillertut ammalortut sinai killavaartut. Pilutai ukiakkut aappillertarput. Naarlaavi meqquluaasaqarput.

Pilutai sikkersuilu
Avaalaqiaq naasumi ataatsimi angutivissamik arnavissanillu paarnarloqarfeqarpoq. Pujoralai angutivissamiit arnavissamut anorimit tingitaasarput. Inerittui eqimasut qaqqortarissat suluusallit mikisuaqqat.

Avaalaqiaq unnguusalik

Qallunaatut atia: Kirtel-birk
Latiinerisut atia: Betula glandulosa
Tuluttut atia: Resin Birch
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Orpiit qisussiassakkut
Ilaqutai: Orpiit (Avaalaqiakuluut)

Avaalaqiaq unnguusalik naasarpoq paarnaqutaannalinni qatsissumilu. Avaalaqissanut assingusorujussuuvoq.

Avalequtai pilutaalu
Pilutaqarpoq akuttusuunik, qillertunik ammalortunik, sinai killavaartut ammalortut. Pilutai avaalaqissat pilutaannit annerupput. Naarlaavi qinersinik qaqortunik meqqoqarput kutsunnik.

Sikkersui inerittuilu
Paarnarloqarfeqarpoq angutivissanik arnavissanillu. Paarnarloqarfiinit angutivissaniit arnavissanut naasussaasa pujoralaat anorimit tinginneqartarput. Inerittussaat avaalaqissat inerittussaattut ipput.

Issittup orpigaa

Qallunaatut atia: Arktisk pil
Latiinerisut atia: Salix arctica
Tuluttut atia: Salix arctica
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Orpikkakkut
Ilaqutai: Orpikkat

Issittup orpigaa pukkitsuuvoq nunamut tunngasoq, avalequtai sorlanikkaangamik naasoq nutaanngortarluni. Naarlaavi manissuupput.

Pilutai
Pilutaqarpoq manningasunik tumaasanilluunniiit qorsuk asingasunik. Pilutaasa naarlaasa atai meqqoqarput.

Sikkersui inerittuilu
Paarnarlui makittarissut angutivissaniillutillu arnavissaniipput. Inerittussaasivii torsusuunik meqqullit aappalungusersuupput. Taakkunaniipput inerittussai anorimit tingitaasartut.

Issutaasat

Qallunaatut atia: Moslyng
Latiinerisut atia: Cassiope hypnoides
Tuluttut atia: Moss Heater
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Issutaasat naasarput apusineqarfinni orpigaasatut torsusuunngorlutik issuatsiaanut eqqaanarlutik.

Kanaartaa pilutaalu
Naarlaavi makittarissut kanaartai avalequtitaartortartut, naatsunik qorsuujuaannartunik meqqutaasanik pilutallit.

Sikkersui inerittuilu
Sikkersui sianiusat qaqortut nivingasut aappaluttunik avallernik pilutaqarlutillu aappaluttumik kanaartallit. Inerittussaasivia ammalloringajattoq 5-nik ammartartunik sipiniusalik.

Issutit

Qallunaatut atia: Kantlyng
Latiinerisut atia: Cassiope tetragona
Tuluttut atia: White Arctic Bell-heather
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Issutit naasarput paarnaqutaannalinni panertuni ukiukkut apisartuni. Kujasissumi qatsissumi imaluunniit alanngortami sivinganerni.

Kanaartaa pilutaalu
Issutit orpigaapput avalequtillit, qorsuujuaannartut, kanaartai sisamanik teqeqqullit, pilutai mikisut tattaasat kanaartaanut tunngasut tunuleriiaat sisamat. Pilutai tipigissut.

Sikkersui
Sikkersui sianiusat, sikisartut sungarpaluttunik aappalungajattunilluunniit kanaartaqarlutillu avallernik pilutallit.

Kakillarnaq, Paarnaqulluk

Qallunaatut atia: Fjeld-ene
Latiinerisut atia: Juniperus communis alpina
Tuluttut atia: Alpine Juniper
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Orpiliassakkut
Ilaqutai: Kakillarnat

Kakillarnaq naasarpoq paarnaqutaannalinni, qaarsuni orpikkallu akornanni.

Meqqutaasai sikkersuilu
Kakillarnaq orpigaavoq pukkitsoq meqqutaasalik, takisuunik noqarutilinnik naasartunik avalequtilik. Meqqutaasai kapinartut tungujortut qorsorpaluttut qaqortumik titarniisallit. Pingasukkuutaarlutik nigalinngorlutik sanileriiaartut.
Angutiviaallutillu arnaviaapput. Angutivissat sungarpaluttunik sikkersoqarput, arnavissat paarnarluaraqarlutik naatsiiassaasivittut quppersartutut inerittartumik. Paarnarlui qorsooriarlutik tungujuartunngortarput.

Kigutaarnat nagguii

Qallunaatut atia: Mosebølle (Blåbær)
Latiinerisut atia: Vaccinium uliginosum
Tuluttut atia: Arctic Blueberry, Bog Bilberry
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Kigutaarnat nagguii orpigaasaapput avalequtilerujussuit, naasartut Kalaallit Nunaata annersaani masarsunni paarnaqutaannalinnilu. Nalinginnaavoq.

Avalequtai pilutaalu
Avalequteqarput qasertut kajuartunik meqqulinnik eqimattatut naasartunik. Pilutai qassutaasaapput tumaasat, sinai manissut ataatungaat tungujortut qasertut.

Sikkersui inerittuilu
Sikkersui qummuattaasat qaqortuunngikkunik aappaluartut. Paarnai tungujuartut amitsukujuut. Ataasiakkaarput imaluunniit ikittunnguakkuutaarput.

Kimmernaqutit

Qallunaatut atia: Tyttebær
Latiinerisut atia: Vaccinium vitis-idaea
Tuluttut atia: Rock Cranberry
Sorlernut ilaava: Orpinnut orpikkanullu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Kimmernaqutit orpigaaraavoq qorsuujuaannartoq, eqimattakkuutaarluni naasartoq. Nalinginnaavoq paarnaqutaannalinni masarsunnilu.

Pilutai, sikkersui inerittuilu
Pilutai tumaasat mikisut issukullaat, qitermikkut erseqqissumik avinniisallit atai taartunik qinersiisallit. Sikkersui qaqortut aappalungusersut qarsungasut 5-nik sipiniusallit. Eqimattat 5-10-kkuutaartarput. Paarnai qaqortut inerikkaangamik aappaluttunngortarput, ammallorissut, isseqarluartut, seernalaartut. Kimmernat marmeladeliarineqartarput gelé-liarineqartarlutilluunniit.

Napaartoq

Qallunaatut atia: Grønlandsk røn
Latiinerisut atia: Sorbus groenlandica
Tuluttut atia: Mountain Ash
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Ruusakkut
Ilaqutai: Ruusat

Napaartoq Kujataani kangerluit qinnguini orpigaqarfinni naasarpoq.

Pilutai
Pilutaqarpoq 10-20 cm-isut atsigisunik tamarmik immikkuutaartunik 6-7-nik pilutaaralinnik, nuuani pilutaa ataaseq. Pilutai tumaasat sinai killavaartut.

Sikkersui inerittuilu
Sikkersui qaqortut mikisut 5-nik pilutaarallit. Taakku 6-10 cm-isut atsigisuni affarmik qaamasortaasaniipput. Paarnai orangeat seernartut.

Oqaasaq

Qallunaatut atia: Arktisk alperose
Latiinerisut atia: Rhododendron lapponicum
Tuluttut atia: Lapland Rose-bay
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Oqaasaq orpigaavoq avalequtitaartortartoq. Naasarpoq Kitaani Tunumilu issumi panertumi paarnaqutaannalinni masarsunnilu, avannamut Inglefield Land aamma Tunup avannaani Skærfjorden tikillugit.

Pilutai sikkersuilu
Pilutaqarpoq issukullannik tumaasanik tipigissunik, atai kajortunik manngertornermut eqqaanartunik meqqulinnik. Pilutai sikkersuilu kanaartaasa nuuiniipput. Sikkersui aappaluttut tunguusat pilutaarallit manngumikkut katinngasut, kanaartaani qinersini meqqulinni ataatsimoortut 2-6-kkuutaartut.

Orpigaq

Qallunaatut atia: Blågrå pil
Latiinerisut atia: Salix glauca
Tuluttut atia: Northern Willow
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Orpikkakkut
Ilaqutai: Orpikkat

Orpigaq nuna atuarlugu naasarpoq makittarissuusinnaalluniluunniit. Naasarpoq paarnaqutaannalinni, qatsissumi, sivinganerni kuuillu sinaanni.

Pilutai
Pilutai tungujuartuunngikkunik qasertut qorsorpaluttut, qiviuusallit amitsukujuut, tumaasat manningasulluunniit, sinai manissut.

Sikkersui inerittuilu
Sungarpaluttunik kajungajattunik taartunik tamarmik immikkut angutivissanik arnavissanillu paarnarloqarfeqarpoq. Inerittussaasivii qorsorpaluttut meqquluallit, paarnarlui sungaartut kajuartunik meqqulualinnik tattaasallit.

Orpigaq masarsummiu

Qallunaatut atia: Tundra-pil
Latiinerisut atia: Salix arctophila
Tuluttut atia: Northern Willow
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Orpikkakkut
Ilaqutai: Orpikkat

Orpigaq masarsummiu Kitaani kujasissumi, avannamut Uummannaq tikillugu naasarpoq masarsunni, issuatsiaani tasinnguanilu.

Avalequtai pilutaalu
Orpigaavoq makittarissunik nalasunik sorlanittartunik avalequtilik, tumaasanik manningasunilluunniit pilutalik, qaavi qillertunik qorsuk taartunik ataallu qorsuk tungujuartunik.

Sikkersui
Paarnarloqarfeqarpoq makittarissunik aappalungusersunik takisuunik meqqulinnik. Paarnarloqarfiit angutivissat arnavissallu naasuni immikkoortuniipput.

Orpik

Qallunaatut atia: Fjeld-birk (Dun-birk)
Latiinerisut atia: Betula szechuanica
Tuluttut atia: Sichuan Birch
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Orpiit qisussiassakkut
Ilaqutai: Avaalaqiat

Orpiit Kalaallit Nunaanni 10 meterisut takitigilersinnaapput. Kitaani kujasissumi kangerluit qinnguini qooqquni oqquartani naasarput.

Naarlaat, pilutai sikkersuilu
Orpik najungalluni ataatsimoortorsuanngorluni naasinnaasarpoq. Naarlaavi qivioqarput. Pilutai manningasut sinai killavaartut, kanaartaani qorsuusuni akuttusuut. Pilutai ukiakkut sungaartittarput. Pisoqaanerit oqummik svampemik naaffigineqarsinnaasarput.
Orpik naasumi ataatsimi paarnarloqarfeqarpoq angutivissanik arnavissanillu. Paarnarloqarfii angutivissat takisuut nivingaannarput, arnavissat naannerusut nipinngallutik.

Paarnaqutikuluut

Qallunaatut atia: Blålyng
Latiinerisut atia: Phyllodoce coerulea
Tuluttut atia: Mountain-heather
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Paarnaqutikuluut orpigaapput pukkitsut orlingasunik avalequtillit. Naasarput paarnaqutaannalinni panertuni, ukiukkut apisartuni.

Pilutai sikkersuilu
Paarnaqutikuluut sikkersimanatik paarnaqutinut assingupput. Marluullutik pilutaqarput meqqutaasanik, akulikitsunik qorsuujuaannartunik. Paarnaqutikuluut sikkersoqarput nivingasunik qummuattamut assingusunik. Sikkersui aappaluttooriarlutik tunguusanngortarput. Kanaartai pilutaalu aappaluttoq taartuupput, nipoqqaaluttut, qinersinik meqqullit.

Paarnaqutit

Qallunaatut atia: Fjeld-revling (Sortebær)
Latiinerisut atia: Empetrum hermaphroditum
Tuluttut atia: Crowberry
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Paarnaqutit nalinginnaapput paarnaqutaannalinni masarsunnilu, pingaartumik sinerissami isugutasuni.

Avalequtai pilutaalu
Orpigaaraavoq akulikitsunik, meqqutaasanik qorsuujuaannartunik pilutaaralik.

Sikkersui inerittuilu
Sikkersui mikisut, qernertut aappalungajattut angutiviaallutillu arnavissat, pilutaasa noorpiaaniittut. Paarnai qernertut angisuut kigutillit.

Palleq

Qallunaatut atia: Bjerg-el
Latiinerisut atia: Alnus crispa
Tuluttut atia: Green Alder
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Orpiit qisussiassakkut
Ilaqutai: Orpiit (Avaalaqiakuluut)

Palleq Kitaani Kujataanilu naasarpoq. Orpeeraavoq orpigaalluniluunniit, naasartoq isugutasumi kuuit sinaanni masarsoqarfinnilu, kiisalu orpikkat akornanni.

Pilutai sikkersuilu
Palleq pilutaqarpoq manningasunik, ammalungajattunik sinai killavaartunik, qorsuk taartunik 3-10 cm-isut takitigisunik. Sikkersui mikisut paarnarluini angutiviaallutillu arnaviaasuniipput. Paarnarlui angutivissat amitsukujuut, arnavissat manningasut paarnarluaqqat. Paarnarloqarfii angutivissat arnavissallu naasumi ataatsimiipput.

Piluusat

Qallunaatut atia: Dværg-pil
Latiinerisut atia: Salix herbacea
Tuluttut atia: Herb-like Willow
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Orpikkakkut
Ilaqutai: Orpikkat

Piluusat orpigaapput pukkitsut amitsunik nunap iluatigoortunik sorlannguuttartunik avalequtillit. Naasarpoq sivinganerni, masarsunni apusineqarfinnilu.

Pilutai, sikkersui inerittuilu
Avalequtaasa nuui nunami puttusimasut. Tamarmik immikkut 2-4-nik pilutaqarput ammalortunik, sinai killavaartuaqqanik qillertunik. Mikisunik ammalortunik angutivissanik arnavissanillu paarnarloqarfeqarput. Paarnarloqarfii arnavissat 2-9-nik sikkersoqartarput. Taakku kingusinnerusukkut inerittussaasivinngortarput aappaluttut kajuartut.

Qajaasaaraq

Qallunaatut atia: Mose-post
Latiinerisut atia: Rhododendron tomentosum, Ledum palustre
Tuluttut atia: Marsh Labrador-tea
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Qajaasaaraq naasarpoq Kitaani masarsunni aamma paarnaqutaannalinni isugutasuni issuatsiaalinni.

Avalequtai pilutaalu
Qajaasaaraq orpigaavoq orlingasunik, meqqulinnik avalequtilik qorsuujuaannartunik pilutalik. Pilutaasa atai kajortunik manngertorningasunik meqqullit, amitsut sinai silammut qullungasut. Pilutai ukiukkut nakkaaneq ajorput.

Sikkersui
Sikkersuisa pilutai qaqortut angisuut tamarmik immikkut 10-25-nik sikkersullit. Sikkersui 5-nik pilutaqarput 10-nik pujoralatserutaasiveqarlutik.

Qajaasaq

Qallunaatut atia: Grønlandsk post
Latiinerisut atia: Rhododendron groenlandicum, Ledum groenlandicum
Tuluttut atia: Bog Labrador Tea
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Paarnaqutit

Qajaasaq orpigaavoq Kitaata kujasissuani paarnaqutaannalinni, orpigaqarfinni masarsunnilu naasartoq.

Avalequtai pilutaalu
Qajaasaq meqquluaasalinnik qummut sammisunik avalequteqarpoq, amitsukujuunik qorsuujuaannartunik pilutaqarluni sinai silammut qullungasunik. Pilutaasa atai kajortunik manngertorningasunik meqqoqarput.

Sikkersui
Sikkersoqarpoq qaqortunik kaavequtaat 5-nik pilutalinnik 5-8-nik ineritussaasiveqarluni. Sikkersoqarfia sikkersoqarfeqarpoq kanaartaaralinnik, tamarmik immikkut 12-30-nik sikkersoqartartunik.

Qunersut

Qallunaatut atia: Fjeldpryd
Latiinerisut atia: Diapensia lapponica
Tuluttut atia: Lapland Diapensia
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Paarnaqutikkut
Ilaqutai: Kakillarnat

Qunersut naasarpoq paarnaqutaannalinni qatsissumilu. Orpigaaraavoq torsusuunik avalequteerarpassualik eqimattakkuutaarluni naasartoq.

Kanaartai, pilutai kaavequtaalu
Qunersut mikisunik qorsuujuaannartunik iloqqasunik pilutaqarput. Pilutaasa sinai manissut issusuut oqaasat, nuui tunummut peqingasut. Kanaartai aappaluttut ataasiakkaanik qaqortunik sikkersullit. Sikkersui tamarmik immikkut 5-nik pilutaaraqarput, 5-nik angutiviartaqarlutik 5-nillu sungaartut qorsunnik avallernik pilutaqarlutik.

Tupaarnaq

Qallunaatut atia: Skotsk timian
Latiinerisut atia: Thymus praecox
Tuluttut atia: Arctic Thyme
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Qarluusalikkut
Ilaqutai: Qarluusallit

Tupaarnaq orpigaaraavoq nunamut tunngasoq sivinganerni, paarnaqutaannalinni orpigaqarfinnilu naasartoq.

Kanaartaa pilutaalu
Pilutai tumaasat issukullaat kanaartamikkut meqquluallit. Tipigissuugamik nerisassiornermi akuutissatut atorneqarsinnaapput. Kanaartai nuna atuarlugu naasartut sisamanik teqeqqullit, sammivimmikkut marluusutigut meqqullit.

Sikkersui
Sikkersui aappaluttut tunguusat kanaartaasa narlusuut mannguini eqimasut. Sikkersui pilutaaraallu marlunnik qarluusaqarput.

Umerluusaq

Qallunaatut atia: Rypelyng (Fjeldsimmer)
Latiinerisut atia: Dryas integrifolia
Tuluttut atia: Mountain Avens
Gruppi: Orpiit orpikkallu
Naasoqatai: Naaqqaatit marlunnik pilutallit
Ordeni: Ruusakkut
Ilaqutai: Ruusat

Umerluusat Kalaallit Nunaanni sumi tamaani qatsissumi paarnaqutaannalinnilu panertuni ujaraaralinnilu naasarput.

Avalequtai, pilutai kaavequtaalu
Pukkitsuuvoq torsusooq avalequtai nalasut sikkersoqarfii 6 cm tikillugit takissusillit. Pilutai ukiukkut qorsuujuaannartut issusuut qaavi qillertut, ataalu qarsungasut. Kanaartai naatsut. Sikkersui qaqortut 7-9-nik pilutallit amerlasuunik pujoralassaasiveqarlutillu angutiviartallit aammalu ermusiusai aappaluttut meqqoqarlutik. Inerittussaqaleraangat pujoralassaasivii tallisarput.