Kinguppak (Raaja)

Qallunaatut atia: Dybvandsreje
Latiinerisut atia: Pandalus borealis
Tuluttut atia: Pink Shrimp; Northern Shrimp
Sorlernut ilaava: Peqqunnut
Uumasoqatai: Peqquit qulinik niullit
Ilaqutai: Pandalidae

Kinguppak Kalaallit Nunaata sineriaani, pingaartumik Kujataata kangisissuani Kitaanilu imaani nillertumi sumi tamani uumasuuvoq. Kinguppak Kalaallit Nunaanni aalisagaavoq aningaasarsiornermut isumalluutitut pingaarutilik.

Ilisarnaatai
Kinguppaat aappillarissuupput qernertunik ammalortunik isillit, marlunnik illugiinnik maluginiutillit, illugiinnik tallimanik niullit eqqummikkullu mikisunik tallimanik illugiinnik isigallit naluutinik, aammalu qalerussamik siornatungaani qaamikkut pilattuutaasanik kapinartullit.

Nerisai
Kinguppaat imaani qaffasissumi unnuakkut nerisassarsiortarput. Nerisaraat algit uumasuaqqallu assigiinngitsut. Ulluunerani immap naqqanut qanittumiittarput.

Dybvandsreje - Pandalus borealis - Pink Shrimp; Northern Shrimp
Paasissutissat
  • Uumaffii: Imaq
  • Takissusia: 16,5 cm tikillugit
  • Kinguppaat arnaviaallutillu angutiviaapput
  • Mannii: Ukiumut 1000-4000
  • Piaraat immap ikerinnaaniittarput qaammatini siullerni 1-3-ni
  • Arfinileriarlutik piaraasarput
  • Sivisunerpaamik uumasarput: Ukiut 10 miss.
Nalunngiliuk?
Kinguppaat arnaviaallutillu angutiviaapput. Kalaallit Nunaanni ukiut siulliit 6-8 angutiviaasarput, taavalu arnavianngortarlutik. Arnaviaq juuli-oktoberimi suffisarpoq, angutivissamit immutsikkanik. Arnavissap suani ukiup tullissaanut toqqortarisarpai, april-juunimi tukertittarlugit.